Inspiriert duch ein Endo Anaconda Konzert

Und es verrist mr gäng s Herz 

Alles reimt sich uf Schmerz 

Aber mi Schmerz reimt sich uf gar nüd 

Denn er isch so noch und doch so wit wäg 

Es duet so weh aber ich loss es nid zue und drum machts gar nid weh 

Nei, nei, es macht nid weh


Mit offene Auge gang ich blind durch diä Welt und denk so oft „Scheisse“! 

Du bisch weg 

Und ich bi no do 

Total unfair, denn keine het de ander verloh 

Jetzt hogg ich do und du viellicht au irgendwo dört obe 

Ich ha Dir mini Schuld mitgäh und du hesch mr dini do gloh 

Viellicht au nid 

Viellicht isch jetzt alles andersch und ich bis nümmi 

Ich bi jetzt eifach ich, so wies si muess und s Läbe goht witter oder viellicht au nid 

Jede Schritt woni mach duet eifach weh will ich gseh was hätt könne si wenns nid so ko wär 

Aber es isch jetzt halt so cho 

Und was schlimmste isch ich ka dr nid sage wie leid es mir duet 

Und wenn ichs könnt, denn wüsst ich du würdschs verstoh 

Trotzdem machts weh 

Du hesch mr so viel könne näh und mit däm hesch mr schlussendlich mini Freiheit gäh

Du frogsch di viellicht ob ich di jemals gliebt ha, ich ha nie öbis anderes gmacht 

Wo du gstorbe bisch hets grägnet und wenn au zwüschedure dusse d Sunne gschiene het 

I mir hets immer witter grägnet 

Aber ich ha kei Angst vor de Fluet, d Fluet das bin ich, d Fluet, das isch e Teil vo mir

D Fluet das bisch du und was no kunnt und was gsi isch und was ich keinem trau sage

Und mängisch bini leer und mängisch so voll dass ich fast platz und ich ka nid renne 

Will alles stillstoht während sich d Welt so schnell witterdreiht 

Alli drugge und drängle will sie Angst vor Nöchi händ 

Jede suecht de Notusgang aber jede will in de erste Reihe stoh 

Und wo stand ich?

Es störe mi mini Reim und dass es sich nid reimt stört mi au 

Aber eigentlich ischs mir au scheiss egal 

Fuck’em all 

Und wenni wieder mol still uf nem Bänkli sitz 

Oder im ne Konzertsaal stoh und eine wie de Endo singt 

Wenni wieder mol mit de Träne kämpf denn sötts kei Unentschiede si 

Mir alli sind komischi Cheibe 

Und das isch so verdammt OK 

S Läbe goht witter 

Und es brennt… und brennt… und brennt und brennt 

S Läbe brennt 

Ich bi d Fluet 

Und ich brenn